Ecc 12 | TVK | STEP | E melele xa mube maxoe tamu, bos mak mu tengan ti munem usil ngan xa tepeas ni xamim. Reitin, munem usili vengan xa melengien xil te longpangasien di bemei e huram xil xa ti imei. E melele nen ak, munavesi pupu ni xamim ti mun.

Ecclesiastes 12

1 E melele xa mube maxoe tamu,
bos mak mu tengan ti munem usil ngan xa tepeas ni xamim.
Reitin, munem usili vengan xa melengien xil te longpangasien di bemei e huram xil xa ti imei.
E melele nen ak, munavesi pupu ni xamim ti mun.
2 Melele xa meulien namim mei ivus,
ixoni ngan xa eai, aveti e hitu xil mei ihe maluxoluken,
e momah te us nave reling xamim ti.
3 Hemim xa di lasikoe xol xamim,
ti limalili.
Lemim xa taxeak momal,
limavus.
Lohomim xil xa di mutekar lelen anien amim ni,
holu likiri e linapol kuhi ti mun.
E metemim xa di muketeh mupus holesok xil ni,
mei munapus kuh ti neta mun ni.
4 Vurangemim ivon ni holesok xil xa ti listal visal xamim.
Munalong ti mun liten te sisien xil mu tangalen te anien xa labasi e valiei.
E seselen na tuman xil te makoe roroh
lisiasi ni xamim e lipurun paten namim.
5 Ulimim ikan tengan mukakao
e muhe rute xil xa be nesao.
Hilumim imieh,
e ixeih tengan mutamea ve rute ngan
vengan xa munahur ti mun xeihen.
Ti, itutou ni sexien xil ak, muha sung muhe von ngengelen kor namim,
e ti litang ve xamim e suse xil te metimal.

7 Ti, tiei namim itilomun ihe meas,
e ninin namim itilomun ihe visal Hi xa tesa ni.

Selxatien Kor

Eklisiastes 12:9-14

9 Moletin te Pispisien ak tehe metisou pupu. E neta tei mun xa xi tepol ni, xi di tesa kilakilen mi moletin xil. Xi telang ves sepinien xil te metisouen, tenem usil koute teni, e teling xil temal e vanuvei tei. 10 Xi tesak tengan vakamet sepinien xil xa momal, di, tetisi tengan reitinen teni mei vamase.

11 Sepinien te metisouen xil ak, langgoni mavulut liei xil xa moletin xil xa di laxat sipsip di lating xolol sipsip sae xil ni tengan lakakao vamal. Reitin, xil langgoni nil xil xa ladi xat neta ngan ni tengan mei ixeih kuhi.

12 Natuxoli, uhusil kuh sepinien navan xil ak vengan xa vanuvei xil xa moletin xil di ladisi, osakras ovuli sen xil vus. E sexien xa moletin bit vakilakil ti mu, isak ni ven imel tang.

13 Nasep vuol ni holesok xil vus minuk, e hoxalite teni xiak: umerere ni Hi e uhusil xat rae nan xil, vengan xa rin ak iaxa Hi tepeas ni xouk ven. 14 E Hi ilepis vuol ni holesok xil vus xa ratepol ni e valkesao, e holesok xil mun xa di ratepol xuxus ni. Ma xi ipus kil ngan xil xa bos e ngan xil xa misa.